06.05.2022 لېونۍ مینه
[06.May.2022 - 09:18]لېونۍ مينې کـــړم اشنا د بيابانه ســـره
پرېږدئ چې ګــرځم لېــونی په غــرونو
اوس راته غرونه ګړنګونه
ښکاري د مينـــــې مهالونه
د غره په سر کيږډۍ وهمه د جانانه سره
پرېږدئ چې ګرځم لېــــــــونی په غــرونو
د چا د شوخ نظر لپاره
په غرونو ګرځم ناکراره
ماته دې غوره ببر سر څيرې ګرېوانه سره
پرېږدئ چې ګــــــــــــــرځم لېونی په غرونو
د لېـــــــــــــونۍ مينې د لاسه
ناست يم د غم د غره دپاسه
د تصور په ټال زنګېږم د خپل ځانه سره
پرېږدئ چې ګرځم لېـــــــــونی په غرونو
مينه کې دومــــــره بې پروا يم
چې اوس خوشاله په سارا يم
د مينې شور مې لګېـــدلی د اسمانه سره
پرېږدئ چې ګـــــــــــرځم لېونی په غرونو
(سېلابه ) زړه راته ژړيـــــږي
وړې سلګۍ مې نه ودريږې
اخر به لاړ شــــــم له دنیا نه د ارمانه سره
پرېږدئ چې ګــــــــــرځم لېــونی په غرونو
امان الله سېلاب ساپی
Amanullah Sylab Sapi (Sapai)