04.05.2022ته څوک یې
[04.May.2022 - 10:59]”ته پوهيږې چي ته څوک يې“
ته سمبول يې د يوالي
ته ټپه يې د ملالي
اولسونه يې راويښ کړه
ستا پښتو او پښتونوالي
ته په ښه وخت کي پيدا يې
ورکوې به دا ناخوالي
ته پوهيږې چي ته څوک يې
ته د هر مظلوم صدا يې
ته د خؤږو زړو دوا يې
دغه در په در اولس له
يو ريښتونى مسيحا يې
دوي دي واي چي څه واي
ته رشتيا يې ته رشتيا يې
ته پوهيږې چي ته څوک يې
ته جمدر د خوشحال خان يې
ته خوبونه د امان يې
ته په بيرته راغبرګ سوى
فلسفه د باچا خان يې
د فقير ايپي وارث يې
دريا خان يې ايمل خان يې
ته پوهيږې چي ته څوک يې
ته خبر په خپل مرام ېي
ته په سمه لار روان يې
خامخا به تا پسې ځي
ته مخکښ د دې کاروان يې
اقتدا درپسي سوې
ته د دې ملت امام يې
ته پوهيږې چي ته څوک يې
ته تڼۍ زموږ د ګريوان يې
ته قرار د هر افغان يې
ځکه تا باندي راټول دي
تې د زړونو ترجمان يې
له امو تر اباسينه
ته د هر چا قهرمان يې
ته پوهيږې چي ته څوک يې
ته بچى د احمد شاه يې
د ميروئيس نيکه امسا يې
خانشهيد درته مسکى دى
ته غيرت د پښتونخوا يې
تر ډيلي تر اصفهانه
غځيدلى په هر خوا يې
ته پوهيږې چي ته څوک يې
ته بيخي ډير باندي ګران يې
د پرديس ملا جانان يې
ستا په عکس کي يې ويني
ته شهيد ملي ارمان يې
ستا په ژوند باندي ژوندى دى
بس يو ته يې د زړه توان يې
ته پوهيږې چي ته څوک يې
ته د هر ظلم غبرګون يې
ته ښه زيرى د ژوندون يې
دې غلام محکوم ملت ته
ته يو لاره د خلاسون يې
دې تيارو ته منظور جانه
ته يو څرک د سباون يې
ته پوهيږې چي ته څوک يې
ته پوهيږې چي ته څوک يې
( عبدالله هلال)