04.05.2022غزل
[04.May.2022 - 10:47]غزل
۔۔۔۔۔۔۔۔۔۔۔
د درد سره رشته څه ده د بل انسان احساس دى
يو ښکلې تلوسه څه ده د بل انسان احساس دى
دا زه چې په روډ اودرېږم د زور خلاف نعرې وهم
ملګرو دا جذبه څه ده د بل انسان احساس دى
لفظونه څه دي خيال څه دى اهنګ څه دى او رنګ څه دى
د فن اصلي رتبه څه ده د بل انسان احساس دى
مندر څه دى جمات څه دى ګرجه څه ده کعبه څه ده
روژه څه ده سجده څه ده د بل انسان احساس دى
دليل څه دى منطق څه دى الها د څه فلسفه څه ده
د عقل معجزه څه ده د بل انسان احساس دى
ننګياله که څوک سوال کوي زمونږه احتساب کوي
زمونږه عقيده څه ده دبل انسان احساس دى
( ننګيال يوسفزی)