17.03.2022قامي جرګه
[17.Mar.2022 - 16:24]نظم : "پښتون قامي جرګه"
حفيظ الله ياد
________
دا لاره د بقا ده او د هر پښتون ارمان
پښتون قامي جرګه ده د محکوم افغانستان
را غونډ دي اولسونه د بنو په لوی مېدان
پښتون قامي جرګه ده د محکوم افغانستان
دا پرېکړې د سبا دي د خپلواکه ژوند په لور
ګټي ملي مرام او خلاسوي مو له پېغوره
وړانګې راوړي له لمره او له اور اخلي ټکور
اختيار د خاورې غواړي په رضا وي که په زور
دا لاره د تاريخ ده او دا دود د ميرويس خان
پښتون قامي جرګه ده د محکوم افغانستان
بېلتون د پښتانه له غورځوي حتمن
شعار د خپل نجيب دی يا وطن دی يا کفن
بوراوي به راځي د خپلواکۍ کرو چمن
يا شو به ورک له ځکې يا د ځمکې برخمن
بدل به چاته پرې نه ږدو د خپل څيري ګرېوان
پښتون قامي جرګه ده د محکوم افغانستان
زرخېزه شوله خاوره د بنو يو ځلي بيا
مرکز ده او مرکز به وي د لويې پښتونخوا
جرګې به پکښې د پښتون قام د بقا
هم دا سي افغان ژغوري له پنجو ځه د هر چا
ګټي به پښتونخوا، افغانيه پښتونستان
پښتون قامي جرګه ده د محکوم افغانستان
د قام و مقدمې ته دي راغلي پښتنې
د قام زلمو ته وايي د ميوند د جنګ ټپې
د لوی پامير نه دنګې او اوچتې حوصلې
راوړي يې د فکر مشالونه وهي شپې
سالار يې احمد شاه دی او د دې وخت ايوب خان
پښتون قامي جرګه ده د محکوم افغانستان
دا موج دی دا څپې دي د قامپاله سمندر
و دې جرګې ته سترګې دي د لر او هم د بر
کوټلي پرېکړې کيږي له بولانه تر خېبر
راپاتې دا دستور دئ د اريا او د باختر
شمله به غورځنګ شي د دامان او خراسان
پښتون قامي جرګه ده د محکوم افغانستان
اول به ژاړو، يادوو به تور داستان
دويمه ورځ به څارو شتمنۍ د لوی افغان
پراته چې پرې له وخته دي د سرو زرو ماران
دريمه ورځ تګلاره د پښتون او پاکستان
هم دغه اېجنډا ده او اينه مو د ارمان
پښتون قامي جرګه ده د محکوم افغانستان
تاريخ ليکي هر خپل او هر دښمن د دغه قام
چې څوک څومره ولاړ دي په دې خپل قامي مرام
او چا او چا دي څکلي د بې ننګې ورځې جام
تاريخ به ليکي مشر محمود خان د قام امام
تاريخ کې بخښه نسته، بد يادېږي خاينان
پښتون قامي جرګه ده د محکوم افغانستان
__________