زورور
[16.Mar.2018 - 09:26]د زورورو زورورې کېږي
دلته د نه کېدو خبرې کېږي
ـ
بې زوره هغسې بې زړه، بې وسه
په زرو هغسې وزرې کېږي
ـ
زموږ لمنې هسې تورې نه دي
زموږ په غرونو کې ګورګورې کېږي
ـ
لا دې په دې خاوره څوک زړه نه سېځي
لا پکې شات شته دی، شکرې کېږي
ـ
ما د احساس د اور اوبهٔ ورکړې
د زړه په ځمکه مې سندرې کېږي
ـ
بیا یې څوک نوم اخلي، پښتون یادوي
بیا چېرته جنګ کېږي، لښکرې کېږي
ـ
لا خو څوک ژبه خوځولې نه شي
لا خو په سترګو کې خبرې کېږي
ـ
صابره، هغسې ستا نوم اخلي څوک
په ګودر هغسې خبرې کېږي
ارواښاد صاحب شاه صابر
قامتونه قیامتونه
مخ - ۱۶۸
ـ